Sunday 27 April 2014

အိပ်မက်မြူ(၃)



         “နာမည်က စုနော်။ စု…စု ဆိုတော့…။”
          “ဟုတ်ပါတယ်။ အဲဒီ စာလုံးက တူတူပါပဲ။”
          “မြန်မာ နာမည်တွေထဲမှာ လူပေးများတဲ့ နာမည်များလား။”
          “ဆိုပါတော့လေ…။”
          “ကိုယ့်နာမည်က နိုင်ဂျာ။”
          “ဘယ်လိုရယ်….နင်ဂျာ ဟုတ်လား။”
          “နိုင်ဂျာပါ။ အာဖရိက ကနိုင်ငံတစ်ခုနဲ့ နာမည် တူတူပဲ။”
          “စိတ်မကောင်းပါဘူး။ ကိုယ် တကယ့်ကို မကြားလိုက်လို့ပါ။”
          “မင်းက မြန်မာပြည်ကနေ ဘာလို့ ထွက်လာတာလဲ။”
          “ဒီလိုပါပဲ။ ဒီနိုင်ငံမှာ ကျောင်းတက်ဖို့ အခွင့်အရေး ရလို့ ဆိုပါတော့။”
          “နိုင်ငံရေး အခြေအနေကြောင့်လား။ ကျောင်းတွေလည်းပိတ်သွားသေးတယ် နော်။”
          “ဆိုပါတော့။ အဲဒီ အကြောင်းပြချက်လည်း ပါမှာပေါ့လေ။”
          “ပြောရေး ဆိုခွင့် လွတ်လပ်မှု မရှိဘူးလား။ အဲဒီ အချက်က မင်းအတွက်များ အရေးပါသလား။”
          “အင်းလေ…လွတ်လပ်တာ ကောင်းသားပဲ။ လူတိုင်း လွတ်လပ်တာကို ကြိုက်တာပေါ့။ ဟိုဟာ မပြောရ၊ ဒီဟာ မပြောရလို့ လိုက်ပိတ်ပင်တာ ဘယ်ကြိုက်မလဲနော်။”
          “မင်းက ကျောင်းသားတစ်ယောက် အနေနဲ့ လှုပ်ရှားမှုတွေဘာတွေမှာ ၀င်ပါခဲ့သေးလား။ ဆန္ဒပြတာတွေ ဘာတွေရော။ ဒီလိုအကြောင်းအရာတွေကြောင့် မို့လို့ နိုင်ငံထဲကနေ ထွက်လာတာများလား။”       
          “ကိုယ် ရှင်းရှင်း ပြောရမလား။ ဟန်မဆောင်ဘဲနဲ့ ပြောရမလား။”
          “ပြောလေ…။ နားထောင်နေပါတယ်။”
          “ကိုယ်ဟာ လှုံ့ဆော်သူ တစ်ယောက်လည်း မဟုတ်ဘူး။ မင်းမျှော်လင့်သလို ကိုယ် သိပ်ပြောချင်ပါတယ်။ ဒါပေမယ့် အဲဒါတွေ တစ်ခုမှ ကိုယ်ဝင်မလုပ်ခဲ့ဖူးဘူး။ ကိုယ်ဒီနိုင်ငံကို ရောက်လာရတဲ့ အကြောင်းကလည်း အင်မတန် ရိုးရှင်းပါတယ်။ အိမ်မှာ မနေချင်လို့ အိမ်နဲ့ ဝေးတဲ့ နေရာကို ထွက်လာတာပဲ။”
          အံ့သြတကြီး ငေးကြည့်ကာ ကျန်ခဲ့သော နိုင်ဂျားကို ကျောခိုင်းလျက်က ရယ်ချင်စိတ်ကို မျိုသိပ်ပစ်လိုက်သည်။ စုကတော့ ကိုယ်ဘာလုပ်ချင်သလဲ ဆိုတာကို ကိုယ်သိသည်။ ကိုယ်ဘာပြောချင်လဲ ဆိုတာ ကိုယ်သိသည်။ သူတပါးက ကိုယ့်ကို ဘာပြောစေချင်သလဲ ဆိုတာတော့ (အဲဒီအချိန်တုန်းက) သင်ယူဆဲ ရှိသေး၏။ သည်နေရာ၊ သည်ဒေသက လာလျှင် သည်လို စကားမျိူး၊ သည်လို နောက်ခံမျိုး ရှိစေချင်သည်မှာ လူတွေ၏ မျှော်လင့်ချက်လား။ အားနည်းချက်လား။ ထိုအတွေးက စု ရောက်လာပြီး နှစ်နှစ်လောက်ကြာမှ တဖြည်းဖြည်း လက်ခံလာသည့် အတွေးမျိုး။
          သည်နိုင်ငံကို စရောက်လာကာစက စု တစ်ယောက် ကိုယ့်ကိုယ်ကို အလွန် သနားတတ်ခဲ့သည်။ လူပြက်များ ပြောသလိုပဲ။ ရာသီဥတုက မကောင်း၊ ရာသီဥတုက ကောင်းတော့ အခြေအနေက မပေး။ သည်လိုနှင့် ဆင်ခြေတွေများခဲ့သည်။ သိမ်ငယ် တတ်သည်။ အလွယ်တကူ အားလျော့တတ်သည်။ မျက်ရည်ကျတတ်သည်။ ဒေါသထွက်တတ်သည်။ ဒါပေမယ့်လည်း ဘေးနားပတ်ဝန်းကျင်ကို ကြည့်လိုက်တော့ ဇင်ဘာဘွေမှ အန်ဒရီရာသည် ငွေကြေးဖောင်းပွမှုနှင့် မူဂါဘေ အကြောင်းတို့ကို ညည်းညူလျက်ရှိသည်။ ကွန်ဂိုမှ မာရီရာတာသည် ပြည်တွင်းစစ်အကြောင်းကို စုတို့အား စီကာပတ်ကုံး ပြောပြလေသည်။ ပြီးတော့ မက်ဆီကိုသား မခ်ဂယ်လ်ထံမှ မူးယစ်ဆေးဝါးတိုက်ပွဲများ အကြောင်း၊ နီပေါသား နန္ဒဆီမှ ရှားပါးခြင်းများ အကြောင်း။ ကမ္ဘာကြီးတွင် ကောင်းမှုထက် မကောင်းမှုတို့က လွှမ်းမိုးလေသလား။ တတိယနိုင်ငံတွေပဲလားဟု ဆိုမည်လုပ်တော့ ဟောလိဝုဒ်၏ မြို့တော် လော့စ်အိန်ဂျယ်လ်လစ်စ် ဆင်းရဲသား ရပ်ကွက်မှ လာသော မာရီယာနှင့် ချီကာဂိုမှ မိုက်ကယ်လ်တို့ သည် သူတို့ရပ်ကွက်ထဲမှ ဆေးဂိုဏ်းသားများနှင့် သေနတ်များ အကြောင်းပြောပြလေ၏။ ရုပ်ရှင်ထဲမှာလို ပြည်သူ့ရဲများ ၀ိုင်းရုံမျှနှင့် မဖြိုဖျက်နိုင်သော ဒုစရိုက်မှုနှင့် ရက်စက်မှုတို့သည် လူမျိုးမရွေး၊ ကိုးကွယ်ရာ ဘာသာ မရွေး နေရာတကာ၌ လွှမ်းမိုးလေသည်ဟု စု ၀မ်းနည်းစွာ ယုံကြည် လက်ခံရလေတော့သည်။
          ပြီးတော့ စု၏ အခန်းဖော် လူမည်းမလေးထံမှ၊ အတန်းဖော် အခြောက်ကောင်လေးထံမှ မပြီးသေးသော အခွင့်အရေးတိုက်ပွဲများ အကြောင်းကို သင်ယူရသေး၏။ သည်လိုဆိုတော့ ဘာကြောင့် မိကျောင်းမျက်ရည်*တို့ အလွယ်တကူ မကျတတ်သည်ကို ရေးတေးတေး သဘောပေါက်ချင်လာ၏။ ဟင့်အင်း…စုကတော့ အားရအောင် ငိုလိုက်မည်။ ကိုယ့်အတွက်လည်း ငိုမည်။ အန်ဒရီရာတို့…၊ မာရီရာတာတို့…၊ မာရီယာတို့…အားလုံးအတွက်လည်း ငိုမည်။ မျက်ရည်တွေ ခမ်းခြောက်သွားချင် သွားပါစေ။ ထိုခဏ၌ မျက်ရည်တို့သည် မြစ်ဖြစ်ကာ စုလည်း မိကျောင်းဖြစ်သွားလေသည်ကို အံ့သြစွာတွေ့ရလေသည်။ 

*crocodile tear= ဟန်ဆောင်မျက်ရည်
(ဆက်ရန်)

Thursday 17 April 2014

အိပ်မက်မြူ (၂)



         “မနေဘူး…ဒီအိမ်မှာ နေကို မနေချင်ဘူး။”
          အခန်းအပြင်မှ ငြင်းခုန်သံများကို မကြားချင်၍ ဖွင့်နေသော သီချင်းကို စု အသံကုန်တင်ပစ်လိုက်သည်။ အခန်းထဲမှာ မျိုးကြီး၏ လေပြေက ဆူညံသွားခဲ့သည်။ မေမေကတော့ ပြောသည်။ စုဟာ တော်လှန်ချင်စိတ်တွေ၊ ရုန်းထွက်ချင်စိတ်တွေ ပြင်းထန်နေသူတဲ့။ ဟုတ်လို့လား မေမေရယ်။ တော်လှန်ချင်စိတ်တွေ ပြင်းထန်နေသူထက် မိဘနှစ်ယောက်ကြားက မြေဇာပင်လို့ နည်းနည်းလေးမှ မမြင်မိဘူးလား ဟင်။
          “ကျွန်မမှာ ဘာမှ ပြောစရာ မရှိတော့ဘူး။ ရှင် ဒီမိန်းမနဲ့ ဆက်ပြီး အလုပ်လုပ်နေဦးမယ် ဆိုရင်တော့ ရှင့်ကိုလည်း ကျွန်မ ပေါင်းမနေတော့ဘူး။”
          သီချင်းသံ တိုးအသွားမှာ အပြင်က အသံတွေက အခန်းထဲ ၀င်ဖြစ်အောင် ၀င်လာသေးသည်။ ဖေဖေနှင့် အလုပ်အတူတူလုပ်နေသော မိန်းမ။ ဖေဖေနှင့်သူ့ကို အပြင်မှာ စု အမှတ်တမဲ့ တွေ့ဖူးပါသည်။ တစ်ယောက်နှင့် တစ်ယောက်ကြည့်နေကြသော မျက်လုံးတွေက မရိုးသားတာ အသိသာကြီး။ ဖေဖေက စုကိုတွေ့တော့ မလုံမလဲနှင့် မိတ်ဆက်ပေးသည်။ စုကတော့ ဟန်ပင် မဆောင်နိုင်ဘဲ ဖေဖေ…အိမ်မှာ မေမေစောင့်နေလိမ့်မယ်…စုပြန်တော့မယ်ဟု ဆိုကာ ချာကနဲ လှည့်ထွက်ခဲ့သည်။ ဖေဖေမျက်နှာ ကွက်ကနဲ ပျက်သွားသည်ကို စုမြင်ဖြစ်အောင် မြင်လိုက်သေးသည်လေ။ စိတ်တော့ မကောင်းပါ ဖေဖေ။ ဒါပေမယ့် သမီးတစ်ယောက် အနေနှင့် ဒီလောက်တော့ ရိုင်းပျခွင့်ပြုပါ။
          “မင်း သမီးကို မင်းဆုံးမဦး။ ဒီနေ့ ငါ့ဧည့်သည်နဲ့ မိတ်ဆက်ပေးတာကို မခေါ်ချင်သလို၊ မပြောချင်သလိုနဲ့ ထွက်သွားတယ်။ သိပ်ရိုင်းတာပဲ။”
          “ကျွန်မ သမီးကို ကျွန်မ ဆုံးမနိုင်တယ်။ နောက်တစ်ခါ ရှင့်ရဲ့ ဧည့်သည် ဆိုတဲ့ အမျိုးသမီးနဲ့ တွေ့ရင် တောင်းပန်ခိုင်းလိုက်မယ်။ ရှင့်ကိုသာ ကျွန်မ မဆုံးမနိုင်တာ။”
          “သြော်…မင်းကပါ ငါ့ကို ရောပြီး စော်ကား နေတာပေါ့လေ။”
          ပြီးတော့ အခုတလော နှစ်ရက်တစ်ခါ သုံးရက်တစ်ခါလောက် ကြားနေရသော ရန်ပွဲကို ကြားရပြန်သည်။ စု ဒီအိမ်မှာ နေလို့ မဖြစ်တော့ပါဘူး။ စာကြည့်စားပွဲပေါ်က ကျောင်းလျှောက်လွှာပုံစံများကို ကောက်၍ စုစည်းလိုက်သည်။ အမေရိကန်နိုင်ငံမှ ကျောင်းတချို့ကို စု စပြီး ဆက်သွယ်ခဲ့သည်မှာ ကြာချေပြီ။ တက္ကသိုလ် ၀င်ခွင့် စာမေးပွဲကိုလည်း စု ဖြေခဲ့ပြီးပြီ။ အခုတော့ ဒီကိစ္စကို အကောင်အထည် ဖော်ဖြစ်အောင် ဖော်ရမည်။ တက္ကသိုလ် ၀င်ခွင့်အပြင် ပညာသင်ဆု ထောက်ပံ့ကြေးငွေပါ ရအောင် ကြိုးစားရဦးမည်။ သင်ဘာကြောင့် ဒီကျောင်းကို တက်ချင်ပါသလဲတဲ့။ အင်း…ကျွန်မအဖေနှင့် အမေ အဆင်မပြေ၍ အိမ်မှ ထွက်ပြေးရန် ရှင်တို့ ကျောင်းသို့ လာချင်ပါသည်ဟု ရေးရမည်လား။ ဟား…ဟား…ရယ်စရာကြီး နေမှာပဲ။ စိတ်ရှုပ်ရှုပ်နှင့် လျှောက်လွှာ စာရွက်များကို ကုတင်ပေါ် ပစ်တင်လိုက်သည်။ နံရံ ဖြူဖြူကို အဓိပ္ပာယ်မရှိ ငေးစိုက်ကြည့်နေမိသည်။ မျက်နှာကျက်မှာ တွားသွားနေသော ပင့်ကူလေးတစ်ကောင်။ သူ ကမ္ဘာမြေကြီးရဲ့ ဆွဲအားကို ဘယ်လိုများ ဆန့်ကျင်ပါလိမ့်။ ဟင့်အင်း…စု ဒီလိုလုပ်နေလို့ မဖြစ်ပါဘူး။ ဒီအခြေအနေကနေ လွန်မြောက်ဖို့က သေသေချာချာ ကြိုးစားမှ ဖြစ်မယ်။
          အိပ်ယာပေါ်မှာ ၀မ်းလျားမှောက်လျက်က အက်ဆေးကို စလိုက်သည်။
          “ကျွန်မသည် သူပုန်တစ်ယောက် ဖြစ်ပါသည်။ ရှိရှိသမျှ အရာအားလုံးကို တော်လှန် ပုန်ကန်ချင်နေပါ၏။…..”
xxx
          အိမ်ကိုရောက်လျှင် မောမောနှင့် စားစရာကို ရှာသော် ရေခဲသေတ္တာထဲမှာ တစ်နေ့က မှာထားပြီး စားမကောင်းလှ၍ မေ့စပြုနေသော တရုတ်ဆိုင်မှ ထမင်းနှင့်ဟင်းကို ပျော်ပျော်ကြီး တွေ့ရလေသည်။ အခုတော့လည်း ဒါသည်ပင် နတ်သုဒ္ဓါ မှတ်ကာ စားတော့မည်ဟု စိတ်ပိုင်း ဖြတ်ပြီးသော် ကိုယ့်ကိုယ်ကို တီဗွီရှေ့     တွင် ထိုင်လျက်သား စု တွေ့ရလေ၏။ စကားပြောမည့်သူ မရှိ၊ ထမင်းအတူ စားမည့်သူ မရှိသည်မှတော့ ကိုယ့်ရှေ့မှာ ငိုပြရယ်ပြနေသော သူများကိုပင် ထိုင်၍ ကြည့်ရတော့မည်။ လူတွေများ ကိုယ့်ဘ၀ထဲမှာသာ အရှုပ်ထုပ်တွေကို မကြိုက်တာ။ သူများတကာရဲ့ အရှုပ်အရှင်းတွေကိုတော့ မြိန်ရေယှက်ရေ ကြည့်တတ်တာပဲ။ ထို့ကြောင့်ပင် အမေရိကန်နိုင်ငံမှာ reality show ဟု ခေါ်ကြသော ဖြစ်ရပ်မှန် ဇာတ်လမ်းတွဲတွေ ခေတ်စားလေသလား။
          အိမ်၏ အရှုပ်အထွေးများမှ လွန်မြောက်ပြီဟု ထင်ရသော် စုကိုယ့်ကိုယ်ကို အနောက်ကမ္ဘာခြမ်းမှာ နေလျက် တစ်ယောက်တည်း တွေ့ရလေသည်။ ဘွဲ့တစ်ခု ရခဲ့သည်မှာ တစ်သက်တာလောက် ကြာပြီဟု ထင်ရသော်လည်း တကယ်တော့ ငါးနှစ်ခန့်သာ ရှိပါသေးသည်။ ဟိုတစ်နေ့က တွေ့ခဲ့သော ကောလိပ်ကျောင်းသား ကောင်လေးတွေ ကောင်မလေးတွေကို ကလေးတွေဟု စိတ်ထဲမှာ ထင်နေမိသည်။ နာမည်ရှိသော ကုမ္ပဏီတစ်ခုမှာ အလုပ်လုပ်နေရ၍ ကိုယ့်ကိုယ်ကို ဟုတ်လှပြီဟု ထင်နေသည်လည်း မဟုတ်ဘဲ သူတို့ထက် ကိုယ့်ကိုယ်ကို အသက် အများကြီးနေသည်ဟု စိတ်ထဲ စွဲနေတော့သည်။ သူတို့အတွက် ရယ်စရာကောင်းသည်များသည် စုအတွက်တော့ အလွန်သေးမွှားသော အရာလေးများ ဖြစ်နေ၏။ နားမလည်သလိုလည်း ဖြစ်မိ၏။ မနာလိုသလိုလည်း ခံစားမိသေး၏။ လောလောဆယ် စု ဘ၀မှာ ဘာများ စိတ်ဝင်စားစရာ ရှိပါသလဲဟုလည်း တွေးမိသည်။ သို့ပေမယ့် အတွင်း စိတ်ခံစားချက်တို့ အားလုံးကို လျစ်လျူရှုကာ သူတို့နှင့်အတူ လိုက်ရယ်ပစ်လိုက်သည်။ သည်လိုဆိုတော့လည်း ပျော်စရာ အကောင်းသားပင်။
          ရယ်ကောင်းကောင်းနှင့် ကြည့်နေစဉ်မှာပင် ခပ်မူးမူး ရှိနေပြီ ဖြစ်သော ကျောင်းသား တချို့သည် ဆိုင်ပြင်သို့ ထွက်ကာ အုပ်စုဖွဲ့ကြပြန်သည်။ အုပ်စုတဖြည်းဖြည်း ကြီးလာတော့ ရဲကားများ ရောက်လာကြသည်။ ပရိပက္ခဖြစ်ကြသည်။ အကြောင်းရင်းကတော့ အမေရိကန်ဘောလုံးပွဲတွင် သူတို့ အသင်းရှုံး၍ ဟုဆို၏။ သည်လိုမြင်ကွင်းမျိုးကို မြင်ခဲ့ဖူးသော စု တစ်ယောက်တော့ အံ့သြကြီးစွာနှင့်ပင် သူတို့၏ ပရိပက္ခကို ထိုင်ကြည့်နေလိုက်သည်။ စု ကြီးပြင်းခဲ့သည့် နေရာမှာတော့ လွတ်လပ်ခြင်းကို ရင်း၍၊ တခါတရံ အသက်ကို ရင်း၍ တော်လှန် ကြသည်။ ထိုင်ဝမ်နိုင်ငံတွင် တရုတ်ပြည် ရုပ်သေးရုပ်ဖြစ်နေသော အစိုးရကို တော်လှန်ကြသည်။ ယူကရိန်းတွင် ရုရှား၏ လွှမ်းမိုးမှုကို တော်လှန်ကြသည်။ သည်မှာတော့ ဘောလုံးပွဲရှုံး၍ တော်လှန်ကြသည်။ တတ်နိုင်သည့် သူများ ကျတော့လည်းဟု တရားကျမိလေသည်။ (အမေရိကန် နိုင်ငံသား အားလုံးတော့လည်း သည်လို မဟုတ်ပါ။)
          နာခံလိုစိတ် နည်းပါသည်ဟူသော စုတစ်ယောက် အခုတော့လည်း စားဝတ်နေရေးဟူသော အာဏာရှင်လက်အောက်မှာ ပိပိပြားပြား ရှိနေလေပြီ။  တကယ်တော့လည်း စုဟာ အိမ်ကထွက်ပြေးချင်သော အိမ်ပြေးတစ်ယောက် သက်သက်ပါပဲ။ 
(ဆက်ရန်)

Sunday 13 April 2014

အိပ်မက်မြူ(၁)



          ဘုရားရေ…။ ဘာတွေ ဖြစ်ကုန်ပြီလဲ…။ အာရုံတွေ အားလုံးစုစည်းဖို့ အတွက် စု နားထောင်နေသည့် သီချင်းသံကို တဖြည်းဖြည်းနှင့် တိုးလိုက်ရသည်။ အမှတ်တမဲ့ လာနေသော လင်ဒါရွမ်းဆတက်ဒ်၏ သီချင်းသည်ပင် စုကို မဆွဲဆောင်နိုင်တော့။ ရန်ကုန်သည် နိုင်ငံတကာ သတင်းထဲတွင် နေရာအများကြီး ရနေကျမဟုတ်ဘူးလေ။ ခုတော့ ခေါင်းစီးထဲမှာ ပါလာတယ်ဆိုတော့။
          “အမျိုးအမည်မသိသော မြူထုကြီးသည် အရှေ့တောင် အာရှကို လွှမ်းမိုးတော့မည်လား” ဆိုပါလား။ မောက်စ်ကို သွက်သွက်ရွှေ့ရင်းနှင့် သတင်းတစ်ပုဒ်က ဆုံးသွားလေသည်။ ဘာမှ ရေရေရာရာ မသိရ။ အကျဉ်းချုပ်တော့ တောင်တရုတ်ပင်လယ်ဖက်မှ ဘာကြောင့်မှန်းမသိ မြူတွေတက်လာသည်တဲ့။ တစ်ရက်အတွင်းမှာပင် ဗီယက်နမ်နှင့် လောနိုင်ငံတို့၏ အစိတ်အပိုင်းတချို့ကို လွှမ်းမိုးသွားခဲ့ပြီ။ ပြီးတော့ အနောက်ဖက်ကို ဆက်၍ ရွေ့လျားနေသည်တဲ့။ ထို့ကြောင့်ပင် ရက်အနည်းငယ်အတွင်း ယိုးဒယားနှင့် မြန်မာနိုင်ငံတောင်ပိုင်းသည်လည်း မြူတွေဆိုင်းသွားနိုင်သည်ဟု ဟောချက်ထုတ်ထားပြန်၏။ ယခုအချိန်အထိတော့ မြူဆိုင်းနေသော နိုင်ငံမှ လူအများ ခရီးသွားလာရေး ခက်ခဲသည်မှ အပ ဘာမှထိခိုက်မှု မရှိဟု ဆိုထား၍ စု တမျိုးတော့ စိတ်အေးရသည်။ သို့ပေမယ့် ရန်ကုန်မြို့နေ နှင့် ဘန်ကောက်မြို့နေ လူအချို့ကတော့ ခေတ္တခဏဖြစ်ဖြစ် ပြောင်းပြေးရန် စီစဉ်နေကြသည်။
          စု ချက်ချင်းဖုံးကို ကောက်ကိုင်လိုက်၏။
          “မေမေ…။”
          “စုလား…။ သမီး ဘာဖြစ်လို့လဲ။”
          “ဘာမှ မဖြစ်ဘူး မေမေ။ မေမေတို့ကို စိတ်ပူလို့ ဆက်လိုက်တာ။ သတင်းတွေ စုတွေ့တယ်။ ရန်ကုန်ရဲ့ အခြေအနေ ဘယ်လိုလဲ။”
          “သြော်…ဒါလား။ စိတ်မပူပါနဲ့။ မေမေတို့လည်း သတင်းတွေ စောင့်ကြည့်နေပါတယ်။”
          “မေမေတို့ မန္တလေးက ကြီးကြီးတို့ဆီ ဖြစ်ဖြစ်ခဏ ရှောင်နေလိုက်ပါလား။ အားလုံး အေးအေးဆေးဆေး ဖြစ်မှ ပြန်လာပေါ့။”
          “မဖြစ်သေးပါဘူး သမီးရယ်။ ဒီမှာ ရှိနေတဲ့ ဆိုင်က မေမေ မရှိရင် မဖြစ်ဘူး။ ပြီးတော့ အခုအထိလည်း ဘာမှ အန္တရာယ်ရှိတယ် ရယ်လို့မှ မကြားသေးဘဲ။”
          ခေါင်းမာလှသော မေမေ့ကို ပြောလို့ ရမည်မဟုတ်သည်ကို စု သိသော်လည်း စိတ်ပူလို့ ပြောမိသည်သာ။ ဖေဖေ့ကိုတော့ သတိရသား။ ဖုန်းဆက်လျှင် ကောင်းမည် ထင်ပါရဲ့လို့ စိတ်ထဲတွေးသော်လည်း ဟိုမိန်းမကြီးနှင့် တိုးနေဦးမည်ဟူသော အတွေးက ချက်ချင်းပင် အဆိုပြုချက်ကို ပယ်ချလိုက်သည်။ မယားငယ် ဆိုသော အသုံးအနှုန်းဖြင့် ရင့်ရင့်သီးသီးပင် စိတ်ထဲက အော်ပစ်လိုက်သည်။ တရိပ်ရိပ်တက်လာသော မုန်းတီးစိတ်တို့ကို မျိုချပစ်လိုက်သည်။ မြို့ထဲနှင့် စမ်းချောင်း၏ အခြေအနေက ပြောပလောက်အောင် ကွာခြားမည်မှ မဟုတ်ဘဲ။ မေမေ့ဆီက တစ်ဆင့်သာ အခြေအနေကို နားထောင်လိုက်တော့မည်။        
          စာတိုက်ပုံး ခိုအိမ်လေးတွေထဲကို စာတွေ ထည့်သော အလုပ်ကို စု လုပ်ခဲ့ဖူးသည်။ စာတိုက်ပုံးနံပါတ်နှင့် နာမည်ကိုစစ်၍ စာတွေကို မှန်မှန်ကန်ကန် ပုံးထဲထည့်။ စစ်လိုက်၊ ထည့်လိုက်နှင့် စာပုံကြီးကို ရှင်းနေလျက်ကနေ စာတွေက ထပ်ရောက်လာပြန်ကာ လျော့၍ မသွားနိုင်သော စာပုံကြီးကို ကြည့်၍ စိတ်ညစ်ခဲ့ရသည့် အရသာကို စု ခံစားခဲ့ဖူးသည်။ အခုလည်း စု ဘ၀က သည်လိုပါပဲ။ တဇတ်ဇတ်နှင့် နေ့စဉ် နိစ္စဒူဝတွေကိုရှင်းနေလျက်က လျော့မသွားဘဲ လုပ်စရာတွေက ထပ်နေမြဲ။ သည်လိုသာ လည်ပတ်နေသော စုရဲ့ တစ်နေ့တာ အတွက်တော့ ဒီနေ့မှာ တမူထူးခြားသွားခဲ့သည်။ ဘာတွေ ဆက်ဖြစ်လာမည် ဆိုတာတော့ စောင့်ကြည့်ရဦးမည်။ ဒါပေမယ့် သည်လို အခြေအနေတွေ ကြုံရပြီ ဆိုလျှင် သဘာဝအတိုင်း စုတွေးမိလေသည်။ ငါ ဒီအခြေအနေကို ဘယ်လို ရောက်လာတာပါလိမ့်။