တကယ်တော့ သူတို့ လေးယောက်ဆုံစရာ အကြောင်းမရှိ သလောက်ပါပဲ။ ဒါပေမယ့် ရေစက်ဆိုတာကိုပဲ ယိုးမယ်ဖွဲ့ရမလား။ သူတို့ ဆုံခဲ့ကြတယ်။ သူတို့ နေထိုင်ရာ အရပ်အသီးသီးကနေပြီး မြို့တစ်မြို့မှာ အစည်းအဝေးတစ်ခုကို တက်ဖို့ ဖန်လာရတယ်။
ပထမဆုံးတော့ လင်းအကြောင်းကို ပြောရမှာပဲ။ သူက အဲဒီဆုံခဲ့ကြတဲ့ အမျိုးသမီးလေးယောက်ထဲမှာ အသက်အကြီးဆုံး။ သူနဲ့ မြလို့ခေါ်တဲ့၊ သူ့ထက် အသက်သုံးနှစ်လောက် ငယ်တဲ့ မိန်းကလေးက တခန်းထဲမှာတည်းဖို့ ဖြစ်လာပါတယ်။ အခန်းထဲကို ကြိုရောက်နေတဲ့ မြကို လင်းက သွက်သွက်လက်လက်နဲ့ နှုတ်ဆက်တယ်။ သူ့နာမည်လိုပါပဲ သူ့မျက်နှာက အင်အားတစ်ခုနဲ့ လင်းနေတယ်။ အမြဲပြုံးနေပြီး၊ သွက်လက် တက်ကြွနေတတ်တယ်။ သူ့မှာ စိတ်ညစ်စရာ၊ တွေဝေစရာတောင် ရှိရဲ့လားလို့ ထင်ရတဲ့ အထိပဲ။ မြကတော့ အေးဆေးပြီး စကားနည်းပါတယ်။ တစ်ယောက်ထဲ နေတတ်တဲ့ သူမျိုးပေါ့။ ဒါပေမယ့် ရည်ရည်မွန်မွန် ရှိတာမို့ လင်းနဲ့ ခင်သွားကြတယ်။
မေနဲ့ ဇွန်ကိုတော့ ထမင်းစားခန်းမှာမှ ဆုံရတယ်။ သူတို့နှစ်ယောက်ကလည်း အခန်းဖော်တွေပဲ။ မေက အားလုံးထဲမှာ အသက်အငယ်ဆုံး။ ဖြူဖြူနွဲ့နွဲ့ ဆံပင်ရှည်ရှည်နဲ့ သိပ်ချစ်စရာကောင်းတဲ့ မိန်းကလေး တစ်ယောက်ပါပဲ။ စကားပြောရင်လည်း ဖြည်းဖြည်းနဲ့ ပြုံးပြီး ပြောတတ်တယ်။ ဇွန်ကတော့ မြနဲ့ ရွယ်တူလောက်ပဲ။ သူက ကိုယ့်ကိုယ်ကို ယုံကြည်မှု ရှိတယ်။ မျက်နှာက ခပ်တည်တည်ပေမယ့် စကားပြောကြည့်တဲ့ အခါ မာနကြီးတာမျိုးကိုတော့ မတွေ့ရပါဘူး။ သူဟာ ထူးချွန်ထက်မြက်တဲ့ အမျိုးသမီး တစ်ယောက်ဆိုတာတော့ ရက်အနည်းငယ် အတွင်း သိလာရပါတယ်။
အစည်းအဝေးပြီးသွားတဲ့ ညတွေမှာ သူတို့ တစ်ယောက်ယောက်အခန်းမှာ စုပြီး စကားထိုင်ပြောဖြစ်ကြတယ်။ တူညီတာရှိလှတယ်မို့ တွဲမိကြတယ်ရယ် မဟုတ်ပါဘူး။ သူတို့ တစ်ယောက်နဲ့ တစ်ယောက် ဘယ်လောက် ခြားနားတယ် ဆိုတာ တဖြည်းဖြည်းတော့ သိလာပါတယ်။ ဒါပေမယ့် တူညီတာ တစ်ခုကတော့ အားလုံးက ပွင့်လင်းကြတယ်။ ဒီလိုနဲ့ သူတို့ စကားတွေ အများကြီး ပြောဖြစ်ကြတယ်။
သူတို့ အားလုံး အလုပ်တွေကိုယ်စီနဲ့ပဲ။ ပထမတော့ အလုပ်အကြောင်း ပြောဖြစ်ကြတယ်။ လင်းနဲ့ ဇွန်က ဆရာဝန်တွေ ဖြစ်ပြီး မြနဲ့မေကတော့ ကုမ္ပဏီ တစ်ခုစီမှာ လုပ်နေတဲ့ ၀န်ထမ်းတွေပေါ့။ နောက်တော့ ကျောင်းတက်ခဲ့တဲ့ အကြောင်းတွေ ဖလှယ်ဖြစ်ကြတယ်။ ဒီနောက်တော့ သူတို့ ပြောခဲ့မိတာက အချစ်အကြောင်းပေါ့။
လင်းက သူ့ရဲ့ ကံမကောင်းတဲ့ အချစ်အကြောင်းကို စလာတော့ သူတို့ အားလုံး အံ့သြသွားခဲ့ကြတယ်။ သူဟာ အခုအချိန်မှာ သူ့အိမ်ထောင်ဖက်နဲ့ ကွာဖို့ ကြိုးစားနေတာပါတဲ့။ သူ့မျက်နှာမှာတော့ ဒီအရိပ်အယောင်တွေဟာ မထင်ဟပ်ဘူး မဟုတ်လား။
“သူက သူ့ဘ၀တိုးတက်ရေး အတွက် ဘာမှ ကြိုးစားချင်တာ မဟုတ်ဘူး။ သူနဲ့ ကိုယ်စတွေ့တုံးက အတိုင်းပဲ သူဟာ ကလေးဆန်ချင်တုန်းပဲ။ အလုပ်အကိုင်လည်း အတည်တကျ မရှိဘူး။ သူပြောင်းလဲလာမယ့် တစ်နေ့ကို ကိုယ် အမြဲစောင့်နေခဲ့တယ်။ အရင်က ရှိခဲ့တဲ့ သံယောဇဉ်လေးနဲ့ သူပြောင်းလဲနိုးနိုး ကိုယ်စောင့်ခဲ့တာ အိမ်ထောင်သက် ငါးနှစ်ရှိခဲ့ပြီ။ နောက်ဆုံးတော့ ကိုယ်သည်းမခံ နိုင်တော့ဘူး။ သူ့ကြောင့် ကိုယ်ကိုယ်တိုင်တောင် တိုးတက်သင့်သလောက် မတိုးတက်ခဲ့ဘူး။ သူ့ကို ကွာရှင်းဖို့ ကိုယ်ပဲ စပြောခဲ့တာပဲ။ ကိုယ် ဒီကနေ ပြန်သွားရင်တော့ ပြတ်ပြတ်သားသား ဖြစ်အောင် လုပ်ရမှာပဲ။”
မြက သူ့ကို ဖြောင်းဖြချင်ပေမယ့် သူ့မျက်နှာမှာ နောင်တနဲ့ ၀မ်းနည်းမှုဆိုလို့ အရိပ်တောင် မတွေ့ရလေတော့ စကားလုံးတွေကို ပြန်ပြီး မြိုချ ဖြစ်ခဲ့တယ်။ မေကတော့ မေးဖြစ်အောင် မေးလိုက်သေးတယ်။ လင်းတို့က ချစ်လို့ လက်ထပ်ခဲ့ကြတာ မဟုတ်ဘူးလားတဲ့။ ဒီလိုဆိုတော့လည်း လင်းက ၀န်ခံပါတယ်။
“ဟုတ်တယ်…ကိုယ်တို့ ချစ်လို့ လက်ထပ်ခဲ့ကြတာ။ အဲဒါကိုက ကိုယ့်အမှားပဲ ထင်ပါတယ် ကွာ။ သူနဲ့ကိုယ် စတွေ့တုန်းက ဆယ်ကျော်သက် အရွယ်မှာ ဆိုတော့ ကိုယ့်ဖြစ်ချင်တာနဲ့ သူဖြစ်ချင်တာတွေကို ညှိနှိုင်းဖို့လည်း မစဉ်းစားခဲ့မိပါဘူး။ နောက်တော့မှ ကိုယ်သဘောပေါက် လာတာကတော့ သူနဲ့ကိုယ်နဲ့ဟာ သွားချင်တဲ့ လမ်းချင်းမှ မတူတာဘဲလေ။ တကယ်တမ်းကျတော့ အချစ်တခုထဲနဲ့ လက်တွဲလိုက်ဖို့ မပြီးဘူး ထင်ပါရဲ့။”
“အရင်ကချစ်ခဲ့ကြတဲ့ ချစ်သူနှစ်ယောက်ဟာ တနေ့နေ့မှာ မျက်နှာချင်းဆိုင်လို့ မရလောက်အောင် ဖြစ်သွားလားဟင်…လင်း။ မေ တကယ်သိချင်လို့ မေးတာပါ။”
လင်းက အဖြေကို အပြုံးတချက်နှင့် ခေါင်းညိတ်၍သာ ပေးပါတယ်။ ပြီးတော့ မေ့ဆီကို ဦးလှည့်တဲ့ မေးခွန်းမေးလိုက်တယ်။
“မေ့ မှာရော ချစ်သူ ရှိတယ် မဟုတ်လား။”
မေက ရှက်ပြုံးပြုံးရင်း ၀န်ခံပါတယ်။ မေတို့ ဇာတ်လမ်းက ကဗျာဆန်တယ်။ မေနဲ့ မေ့ချစ်သူဟာ ခရီးသွားရင်းနဲ့ တွေ့ခဲ့ကြတာပါတဲ့။ မေ့ကို လမ်းတလျှောက်လုံးမှာ မေ့ရဲ့ ချစ်သူလောင်းက အရိပ်တကြည့်ကြည့် လုပ်နေခဲ့တယ်။ နောက်တော့မှ ခင်သွားကြပြီး မေ့အိမ်ကို ပန်းစည်းလေးတွေ ပို့လေ့ရှိတယ်။ ဒီနောက်မှာတော့ သူတို့ နှစ်ယောက် တရားဝင် ချစ်သူတွေ ဖြစ်သွားကြတယ်။ ဒါပေမယ့် ခက်တာက မေ့ချစ်သူက နယ်မြို့လေးတစ်မြို့မှာ နေတယ်။ မေကတော့ မြို့ကြီးသူပေါ့။ အခုဆိုရင် မေတို့ ချစ်သူသက်တမ်း တစ်နှစ်လောက် ရှိပြီတဲ့။ ဆက်သွယ်ရေးတွေ တိုးတက်နေတဲ့ ခေတ်ကြီးထဲမှာ မေတို့ နှစ်ယောက် အမြဲ စကားပြောဖြစ်ပေမယ့် လူချင်း မကြာခဏတွေ့ဖို့တော့ မတတ်နိုင်ခဲ့ကြဘူး။
“မေ ကတော့ သူနဲ့ လက်ထပ်ပြီးရင် သူ့မြို့လေးမှာပဲ လိုက်နေမယ်။ အခုအလုပ်ကထွက်ပြီး ဟိုမှာ ရရာ အလုပ်တစ်ခုခု လုပ်ရင်းနဲ့ သူ့ဘေးနားမှာ အေးအေးဆေးဆေး နေတော့မယ် စိတ်ကူးတယ်။”
“ဟယ်…မေကလည်း မေအခုနေတဲ့ မြို့ကို လူတိုင်းက လာပြီး အလုပ်လုပ်ချင်နေကြတာ။ အခု မေ ကျတော့ ပြောင်းပြန် ဖြစ်နေပြီ။ မေ့ကောင်လေးကသာ မေ့မြို့ကို ပြောင်းလာတာ ပိုသဘာဝမကျဘူးလား။”
ငြိမ်ချက်သားကောင်း နေတဲ့ ဇွန့် ဆီကနေ အားမလို အားမရသံထွက်လာပါတယ်။ မေကတော့ ပြုံးနေပြီး အသာအယာ ခေါင်းယမ်းပါတယ်။
“ဒီလိုလဲ မဟုတ်သေးဘူးလေ ဇွန်ရဲ့။ မေ့မြို့ကို လာချင်တဲ့ သူတွေထဲမှာက မေ့ချစ်သူ မပါဘူးလေ။ သူက မြို့ပြယဉ်ကျေးမှုကို မကြိုက်ဘူး။ လူတွေ အများကြီးနဲ့ နေလည်း မနေနိုင်ဘူး။ အသက်ရှူ ကျပ်တယ်တဲ့။ နောက်ပြီး သူ့နယ်မြို့လေးက အလုပ်မှာက သူ့ကို လေးစားပြီးသား သူတွေ အများကြီးပဲ။ မြို့ကြီးပြကြီးမှာ ၀င်တိုးရင် သူဒီလို နေရာမျိုး ရဖို့ မလွယ်ဘူးလေ။ သူက သူ့အလုပ်ကို သူသိပ်ချစ်တာ။ မေကတော့ ဘယ်နေရာမှာ နေနေ ဖြစ်ပါတယ်။ အလုပ်အကိုင် အတွက်လည်း ရည်ရွယ်ချက် ကြီးကြီးမားမား မရှိပါဘူး။ ဘ၀မှာ ဖြစ်ချင်တာတွေလည်း မများလှပါဘူး။ အိမ်သေးသေး တစ်လုံးနဲ့ မိသားစု နေပျော်ရင် တော်ပါပြီ။ သူ စိတ်ချမ်းသာနေတာ မြင်ရရင်လည်း မေကျေနပ်နေမှာပါ။ ကဲ ပြောပါဦး ဇွန့် အကြောင်းကို။”
စကားလမ်းကြောင်းလွှဲသွားတဲ့ မေ့ကို ဇွန်က အားမလို အားမရ ကြည့်ရင်း သူ့စိတ်ထဲ ရှိတာတွေကို အလျင်အမြန် သိမ်းလိုက်ပုံ ရတယ်။ ဇွန်တို့သာ ဆိုရင်တော့…ဆိုတဲ့ အတွေးမျိုးကို ဇွန်ရဲ့မျက်နှာပေါ်မှာ ဖြတ်ကနဲ အားလုံးက သတိထားမိလိုက်ကြတယ်။ ဇွန်ကတော့ လောလောဆယ်မှာ ရည်းစား မရှိဘူးလို့ ဆိုပါတယ်။
“ဇွန် ကျောင်းမှာတုန်းကတော့ သူငယ်ချင်း တစ်ယောက်နဲ့ ရည်းစား ဖြစ်ခဲ့ဘူးပါတယ်။ ဒါပေမယ့် ကျောင်းပြီးတော့ သူက တနယ်၊ ဇွန်က တနယ်။ တနယ်ဆီမှာ ဝေးနေရမယ့် အဖြစ်ကိုတော့ ဇွန်မလိုချင်ဘူးလေ။ နောက်ပြီး လိုချင်လောက်အောင်လည်း အဆင်သင့် မဖြစ်သေးဘူး။ ဇွန် ဆရာဝန် ကောင်းကောင်း တစ်ယောက်ဖြစ်ချင်သေးတယ်။ အောင်မြင်ချင်သေးတယ်။ ဘွဲ့လွန်လည်း ဖြေချင်သေးတယ်။ လွယ်လွယ် ပြောရင်တော့ အချစ်ရေး ကိစ္စကို ခေါင်းထဲက ခဏထုတ်ထားပြီး အောင်မြင်မှုတွေနောက် လိုက်နေတဲ့ သဘောပေါ့။ အိမ်ထောင်ရေး ကိစ္စကို နောက်မှပဲ စဉ်းစားမယ်လို့ စိတ်ကူးထားတာပဲ။ ဇွန့် အသက် မငယ်တော့ဘူး ဆိုတာ သိပါတယ်။ ဇွန်နဲ့ ရွယ်တူ တချို့ ဆိုရင် ကလေးတွေ ဘာတွေတောင် ရလို့။ ဒါပေမယ့် ဇွန်ကတော့ အပျိုကြီး ဖြစ်လည်းဖြစ်။ ကိုယ်ဖြစ်ချင်တာလေးတွေ ဖြစ်အောင် တစ်ယောက်တည်း လုပ်လိုက်ဦးမယ်လို့ စဉ်းစားတာပဲ။”
“အဲဒါ ဇွန်တကယ် ချစ်တဲ့လူကို မတွေ့သေးလို့ပါ။”
မေက နောက်သလိုလိုနဲ့ ဇွန့်ကို အတည်ပေါက် ပြောလိုက်သေးတယ်။ အဲဒီလို ပြောလာတော့ ဇွန်က အားကျမခံ ပြန်ပြီး မေးခွန်းထုတ်ပါတယ်။ အချစ်ဆိုတာ ဘာလဲတဲ့။ အဲဒီညက ငြင်းကြခုန်ကြတာတွေကတော့ အများကြီးပါပဲ။ ဒါပေမယ့် အချစ်၊ အိမ်ထောင်ရေး အပေါ်မှာ သဘောထားတဲ့ သူတို့ လေးယောက်ရဲ့ သဘောထားက တော်တော် ကွဲပြားတယ် ဆိုတာကိုပဲ အားလုံး သိလိုက်ရတယ်။ ဒါပေမယ့် နောက်တစ်ခု သူတို့စဉ်းစားနေမိတာက အချစ်အပေါ်မှာ ထားတဲ့ သဘောထားကိုလား၊ အချစ်အတွက် ဘ၀မှာ နေရာ ဘယ်လောက်ပေးမယ် ဆိုတဲ့ သဘောထားများလား ဆိုတာပေါ့။
နောက်ဆုံးတော့ စကားဝိုင်းထဲမှာ ကျန်သူ မြရဲ့ အလှည့်ပေါ့။ မြ ချစ်သူက နယ်မြို့လေး တစ်မြို့မှာ ဆရာဝန် လုပ်နေတယ်။ အခုတော့ အခိုက်အတန့် သူတို့ ခွဲနေကြရပါတယ်။ ဒါပေမယ့် သူတို့ နှစ်ဦးရဲ့ ရည်ရွယ်ချက်ကတော့ မြအတွက်ရော၊ သူ့ ချစ်သူ အတွက်ပါ အဆင်ပြေမယ့် မြို့ငယ်လေး တစ်မြို့ကို ပြောင်းမယ်ပေါ့။ ဒါက သူတုိ့နှစ်ဦးရဲ့ ကြားထဲက ကြားနေရွေးချယ်မှုလေ။ မြတို့ အကြောင်းကတော့ သိပ်စိတ်ဝင်စားစရာ အတက်အကျတွေ မရှိလှပါဘူး။ ဒါပေမယ့် သူတို့ ချစ်သူနှစ်ဦး အကြောင်းကြားရတော့မှ ဘ၀နှစ်ခုကို ပေါင်းစပ်ရင် လမ်းသစ် ဆိုတာ ရှိလာနိုင်တယ် ဆိုတဲ့ သဘောကို မြကိုယ်တိုင်တောင် အဲဒီတော့မှ နည်းနည်း နားလည်သလို ရှိလာရတယ်။ တချို့ကတော့ ချစ်သူရဲ့ လမ်းကို ၀င်လျှောက်ဖြစ်ကြတယ်။ တချို့ကတော့ ချစ်သူကို ကိုယ့်လမ်းမှာ လာလျှောက်စေချင်တယ်။ တချို့ကတော့ ချစ်သူနဲ့ပေါင်းပြီး နောက်တစ်လမ်းကို ထွင်လျှောက်ကြတယ်။ ဒါကို သူတို့ နည်းနည်းတော့ မြင်လာကြတယ်။
နောက်နှစ်ရက်ကြာလို့ အစည်းအဝေးပွဲ ပြီးတဲ့ အထိသူတို့ အဲဒီ အကြောင်းကို ထပ်မပြောဖြစ်ကြတော့ပါဘူး။ နောက်တစ်နေ့ ပြန်ရတော့မှာ ဖြစ်လို့ နှုတ်ဆက်ပွဲ အနေနဲ့ အဲဒီညက အသက်အကြီးဆုံး ဖြစ်တဲ့ လင်းကပဲ ညနေစာ လိုက်ကျွေးတယ်။ အားလုံး လွတ်လွတ်လပ်လပ်ပဲ ရယ်စရာတွေ ပြောလို့ပေါ့။ မေကတော့ အားလုံးကို သူ့မင်္ဂလာပွဲ အတွက်ဖိတ်ပါတယ်လို့ ဆိုတယ်။ တကယ်ပဲ လိပ်စာတွေတောင်းလို့ပေါ့။ အဲဒီအချိန်ကျရင် အားလုံးရဲ့ အချစ်ဇာတ်လမ်းတွေကို ထပ်နားထောင်ချင်သေးတယ်လို့ မေက ဆိုပါတယ်။ မြကတော့ ပြုံးပြီး တို့ဇာတ်လမ်းက ဘာမှ စိတ်ဝင်စားစရာ မရှိပါဘူးလို့ ပြောဖြစ်တယ်။ လင်းနဲ့ ဇွန်ကတော့ ငြိမ်နေကြတယ်။
အနားလေးတွေ နည်းနည်းတိုပြီး နည်းနည်းရှည်လာကြပေမယ့် သူတို့ လေးဦးဟာ ဘယ်တော့ အနားညီလာ ကြတော့မှာ မဟုတ်ပါဘူး။ အားလုံး ပြန်သွားကြတဲ့ အချိန်မှာ မေကတော့ အချစ်ဆိုတာ…လို့ အဓိပ္ပာယ် ဖွင့်ဆိုခဲ့ကြပေမယ့် ပုံသေကားချပ် မရှိလှတဲ့ အချစ်အကြောင်းကိုပဲ မရေမရာ တွေးရင်း ကျန်ခဲ့ပါတော့တယ်။
